Ытыктабыллаах Саха сирин олохтоохторо!

um-redactor 12.06.26 07:00

Саха Өрөспүүбүлүкэтин Ил Дархана Айсен Сергеевич Николаев

Россия күнүнэн эҕэрдэтэ

Ис сүрэхпиттэн судаарыстыбабыт сүрүн бырааһынньыгынан – Россия күнүнэн эҕэрдэлиибин!

Хас биирдиибитигэр бу күн ураты суолталаах, судаарыстыба үгүс үйэлэри уҥуордаан кэлбит олоҕун, ааспыт көлүөнэлэри кытта быстыспат ситимин, элбэх омуктаах норуоппут модун санаатын кэрэһилиир. Россия күнэ биһиги баараҕай дойдубутун таптыыр, ураты устуоруйатынан, дириҥ ис хоһоонноох култууратынан уонна үйэлээх духуобунай баайынан киэн туттар, улууканнаах кэскилигэр бигэтик эрэнэр дьону барыларын түмэр.

Бу бырааһынньык Россия аныгы устуоруйатыгар 1990 сыл бэс ыйын 12 күнүгэр судаарыстыбаннай суверенитет туһунан декларация ылыллыаҕыттан бэлиэтэнэр. Россия судаарыстыбаннаһа сүһүөҕэр туруутун Саха сирэ биир бастакынан өйөөбүтүнэн биһиги киэн туттар толору бырааптаахпыт. Бүгүн биһиги тыйыс айылҕалаах Сахабыт сирэ Уһук Илиҥҥэ Россия стратегическай суолталаах бигэ тирэҕинэн буолар.

Аҕа дойдубутугар муҥура суох бэриниибитин күннэтэ таһаарыылаах үлэбитинэн бигэргэтэбит. Биһиги өрөспүүбүлүкэбит Россия энергетичэскэй уонна экэнэмиичэскэй өттүнэн куттала суох буолуутугар сүҥкэн кылаатын киллэрэр, Уһук Илин бүттүүнүн экэниэмикэтин хамсатар күүһүнэн аатырыаҕын аатырар. Тас дойдулар сөҕүмэр ыгыыларын, тууйууларын, аныгы кэм сүҥкэн тургутуутун аахсыбакка, алмааһы хостооһуҥҥа бастаан иһэбит, көмүһү хостооһун дьоһун кээмэйинэн дойдуну бигэтик хааччыйабыт. Саха сирин бырамыысыланньыктарын күүрээннээх үлэлэринэн саҥа кирбиилэри ылабыт, сылтан сыл чоҕу, ньиэби, гааһы хостооһун кээмэйин утумнаахтык улаатыннарабыт.

Ити эрээри биһиги сүрүн баайбытынан мэлдьитин да дьоммут-сэргэбит буолар. Экэниэмикэҕэ ситиһиибит биир үрдүк сыалга – Саха сирин хас биирдии ыалын уйгутугар, хааччыллыытыгар, куттала суох буолуутугар туһаайыллар. Өрөспүүбүлүкэҕэ аныгы оскуолалары, оҕо уһуйааннарын, балыыһалары, успуорт комплекстарын тутуу тэтимнээхтик ыытыллар, хаарбах дьиэлэртэн гражданнары көһөрүүгэ дойдуга ханна да суох далааһыннаах бырагыраама олоххо киллэриллэр.

Бүгүҥҥү бырааһынньык күн махтал ураты тылларын анал байыаннай дьайыы кыттыылаахтарыгар аныыбыт. Анал байыаннай дьайыы кэмигэр 12 биир дойдулаахпыт Россия Федерациятын Дьоруойун үрдүк аатын ылбыттарынан киэн туттабыт. Өрөспүүбүлүкэ барыта уолаттарбытыгар бигэ тыыл, эрэллээх эркин буолар, кинилэр дьиэ кэргэннэригэр дьоһун болҕомтотун уурар.

Бу бырааһынньык күннэригэр өрөспүүбүлүкэ дьонун-сэргэтин уонунан сылларга ыра буолбут санаатын олоххо киллэрэргэ дьоһун суолталаах хардыылары оҥоробут. Аҕыйах хонуктааҕыта улуу Өлүөнэни туоруур муоста бастакы коффердама өрүс сүнньүгэр таһаарылынна. Дойдуга стратегическай суолталаах эбийиэк Россия Федерациятын Президенэ Владимир Владимирович Путин быһаччы сорудаҕынан “Олох инфраструктурата” национальнай бырайыак чэрчитинэн тутуллар. Иннибитигэр далааһыннаах үлэ күүтэр, өссө да үгүс уустук инженернэй соруктары быһаарыахпыт турар, онуоха күүтүүлээх сыалбытын ситиһэргэ дойду муостаны бастыҥ тутааччыларын биир киһи курдук таһаарыылаах үлэлэрэ төһүү буолуоҕа.

Күндү доҕоттор! Бу ситиһии барыта эһигинэ суох – үлэни таптыыр, талааннаах, төрөөбүт сирдэрин ис сүрэхтэриттэн таптыыр дьоно суох кыаллыа суоҕа этэ. Биһиги уопсай ситиһиибит хас биирдиибит күннээҕи үлэтиттэн, эрчимиттэн, дьулууруттан быһаччы тутулуктаах. Ааспыт кэм улуу үгэстэригэр тирэҕирэн, сомоҕолоһон, бэйэбит күүспүтүгэр эрэллээх, дойдубут туһугар өрөспүүбүлүкэбитин сайыннарарга салгыы үлэлиэхпит-хамсыахпыт диэн эрэнэбин!

Ис сүрэхпиттэн эһиэхэ уонна эһиги чугас дьоҥҥутугар чэгиэн доруобуйаны, уҕараабат эрчими, или, бары үтүөнү, уйгуну баҕарабын! Хас биирдии дьиэҕэ таптал уонна өйдөһүү өрөгөйдөөтүн, сүрэххитигэр улуу дойдубутунан киэн туттуу уостубатын!

Бырааһынньыгынан! Улуу Россия күнүнэн!

Саха Өрөспүүбүлүкэтин Ил Дархана                              Айсен Николаев