Бартыһаан нэһилиэгэр аҕам саастаахтарга Ньукуолун күнэ ыытылынна.
Ыам ыйын 22 күнүгэр, Саха сиригэр Ньукуолун уонна Сайылык күнүн чэрчитинэн, Бартыһаан нэһилиэгин «ХОМУС» ф.дь. С. Н.Стручков аатынан «Албан аат» түмэлин тэлгэһэтигэр аҕам саастаахтарга тэрээһин буолан ааста.
Бу күн Самаан сайын салаллыытын Нукуолун саамай сүрүн сиэрэ-туома — алаадьы буһарыыта. Бастакы буспут алаадьыларынан уот иччитин айах тутан, ыам ыйдааҕы сиэри-туому ыытан, кус миининэн өргөҺөлүү буһаран күндүлээтилэр. Бары байанайдаах эр дьоммутугар нэҺилиэк олохтоохторун аатыттан барҕа махталбытын тиэрдэбит!
Кэлбит ыалдьыттар Алгыс ылан, ыраастанан, баҕа санаа эриэккэһин этэн, оһуохадаан сиэри-туому түмүктээтилэр.
Салгыы Ньукуолун остуолугар үгэс буолбут астарынан толору тардыллыбыт итии чэйдээх, кус эттээх итии мииннээх остуолга олорон үөрэ-көтө аһаатылар. Нэһилиэкпит баһылыга Зырянов Алексей Николаевич аҕам саастаахтарыгар күөх чээлэй сайыммыт кэлбитинэн эҕэрдэ тылын эттэ.
Көрдөөх-нардаах бириистээх оонньулары оонньоттулар, эҕэрдэ тыллар этилиннилэр, ыллам ырыалар ылланнылар, сибиэһэй салгыӈӈа олорон, остуол тула ирэ-хоро кэпсэтэн үөрэн-көтөн, махтанан тарҕастылар.
Анаабыт курдук күөх ыраас халлааннаах, чаҕыл күннээх, куйаас үтүө күн буолла.
Кэлбит сайыммыт илгэлээх быйаҥнаах буоллун!
Комментарии