Дьокуускайга Анна Парникова поэзиятын дьоро күнэ үүннэ.
Дьокуускайга, Национальнай библиотека историческай саалатыгар, СӨ Суруйааччыларын сойууһун чилиэнэ, Нам улууһун культуратын Бочуоттаах үлэһитэ, Партизан нэһилиэгин Ытык киһитэ Анна Парникова-Сабарай Илгэ «Күһүҥҥү ыһыаҕым» хоһооннорун хомуурунньугун сүрэхтэннэ.
Поэзия түһүлгэтин дьоро күнүн СӨ норуодунай поэта, Саха сирин Суруйааччыларын сойууһун бэрэссэдээтэлэ Наталья Харлампьева иилээтэ-саҕалаата.
Н.М. Рыкунов аатынан Нам улууһун киин библиотекатын коллектива, Анна Парникова-Сабарай Илгэ бииргэ төрөөбүттэрэ, аймахтара, поэтесса Ольга Корякина-Умсуура, «Отуу уота» литературнай түмсүү, улааппыт-үөскээбит Бартыһаан нэһилиэгин дьоно-сэргэтэ кыттыыны ыллылар.
«Күһүҥҥү ыһыаҕым» саҥа кинигэ Дьокуускайга «Алаас» кинигэ кыһатыгар 500 ахсаанынан бэчээттэнэн тахсыбыт. Кинигэҕэ хоһооннору сэргэ поэт олорон ааспыт олоҕун сырдатар хаартыскалар киирбиттэр.
Биир дойдулаахпыт, суруналыыс «Саха» НКИХ ыытааччыта Георгий Белоусов Анна Парникова-Сабарай Илгэ туһунан, кини айар үлэтин кытта хайдах билсибитин олус истиҥник, сылаастык ахтан-санаан ааста.
«Саха» НКИХ архыыбыттан Анна Парникова-Сабарай Илгэ ыалдьыттаабыт «Көмүс түгэн» биэрииттэн быһа тардан көрдүбүт.
Дарина Константинова
Комментарии