Үүнэ-сайда тур, тапталлаах Бартыһааммыт!
Аҕа баһылык Алексей Зырянов Хомус куттаах нэһилиэк буоларбыт быһыытынан 2026 сылга төрөөбүт икки кыыс уонна биир уол оҕолорбут төрөппүттэригэр Наталия Винокуроваҕа, Матрёна Поповаҕа уонна Айыына Новгородоваҕа хомус бэлэх туттарда. Ону тэҥэ Петр Новгородовка «СӨ тыатын хаһаайыстыбатын туйгуна» бэлиэни туттарда.
Ыалдьыппыт, улуус депутаттарын мунньаҕын бэрэссэдээтэлэ Алексей Винокуров эҕэрдэлээтэ уонна Нина Колесоваҕа, Владимир Алексеевка наҕараадалары туттарда.
Культура сылын аһыллыытынан кулууп үлэһиттэрэ омук тылынан хоһоон ааҕан сонун көстүү буолла.
«Хомус» сынньалаҥ директора Семён Алексеев үрдүкү наҕараадалары Игнат Барамыгиҥҥа, Розалия Макароваҕа, Прокопий Васильевка уонна атыттарга туттарда.
Амина Асоева Бартыһаан өрөгөй ырыатын ыллаата, бары сүһүөхпүтүгэр туран долгуйа-астына иһиттибит.
Түмүгэр нэһилиэк олохтоохторун Партизан «Айылгы» орто оскуолата мип-миннигэс тордунан күндүлээтэ.
Тэрээһиммит олус сэргэхтик ааста, нэһилиэкпит талааннаах дьоно элбэҕэ, оҕолорбут, эдэр ыччаппыт талааннара уонна тупсан иһэллэрэ киһини үөрдэр.
Комментарии