ПАРТИЗАННАР ТЫА ХАҺААЙЫСТЫБАТЫН САЙЫННАРЫЫГА ЭЛБЭХ ЭТИИЛЭРИ КИЛЛЭРДИЛЭР
Киэһэ 5 чаастан Нам улууһун куратора, СР тас сибээскэ уонна норуоттар дьыалаларыгар министрэ Гаврил Кириллин салайааччылаах өрөспүүбүлүкэ Ситэриилээх былааһын отчуоттуур иккис бөлөх Партизан нэһилиэгэр үлэлээтэ.
Мунньахха улуус баһылыгын солбуйааччы Филипп Николаев, тустаах министиэристибэлэр, биэдимистибэлэр бэрэстэбиитэллэрэ кыттыыны ыллылар.
Отчуоту нэһилиэк баһылыга Алексей Зырянов салайан ыытта. Уопсайа 52 киһи кэлэн отчуоту болҕойон иһиттэ.
Бөлөх салайааччыта Гаврил Кириллин үлэ дьонун бэлиэтээтэ. Ол курдук “Кустук” оҕо уһуйаанын иитээччитэ Гермогенова Ефросинья Николаевнаҕа СР Үөрэх министиэристибэтин Бочуоттаах Грамотатын, айылҕа харыстабылын общественной инспектора Зырянов Павел Егоровичка СР Экология, айылҕаны туһаныы уонна ойуур хаһаайыстыбатын министиэристибэтин Бочуоттаах грамотатын үөрүүлээх быһыыга-майгыга туттарда.
Видеонан отчуоту Гаврил Кириллин тылынан ситэрэн биэрдэ.
